Krujë/Paketa e Sigurisë në Shkolla, Balla në gjimnazin “Gjergj Kastrioti Skënderbeu”: Bashkëpunoni sa më shumë me Policinë

Ministri i Brendshëm Taulant Balla ishte sot në Krujë, ku bashkëbisedoi me nxënës e staf pedagogjik të gjimnazit ‘Gjergj Kastrioti Skënderbeu’, lidhur me Paketën e Sigurisë në shkolla. Ky është gjimnazi i parë i hapur në Krujë, 68 vite më parë. Ministri deklaroi se me këtë Paketë, garantohet një nivel tjetër sigurie pranë institucioneve arsimore në gjithë vendin.

“Drejtoresha e tha, që ndoshta është rastësi e bukur që kemi ardhur këtu në shkollën ‘Gjergj Kastrioti Skënderbeu’ në këtë ditë, kur përkujtojmë 556 vjetorin e ndarjes nga jeta të heroit tonë kombëtar. Por nuk është rastësi. Në fakt, ne kemi ardhur sot këtu në kuadër të zbatimit të masave të Paketës së Sigurisë në Shkolla për detyrat që i takojnë jo vetëm Policisë së Shtetit, por edhe një sërë institucionesh shtetërore. Pas një semestri të kaluar, së bashku përgjatë zbatimit të këtyre masave mendoj që kemi bërë gjënë e duhur kur morëm këtë vendim. Rezultatet e deritanishme janë ato që duhet dhe thirrja ime për çdo të ri e çdo të re, por edhe prindërit tuaj, është që të bashkëpunoni sa më shumë me Policinë e Shtetit. Çdo informacion që vjen nga ju është një shtysë dhe bazë e shëndoshë për të luftuar këdo nga ata që kërkon të bëjë biznes me shëndetin tuaj apo financat e familjes suaj”, tha ministri.

Balla i ftoi të rinjtë të rrinë larg veseve dhe afër aktiviteteve sportive.

“Kjo shkollë që mban emrin e heroit kombëtar, është një shkollë shumë e rëndësishme jo vetëm për Krujën, por për gjithë vendin nga e cila ndër vite kanë dalë shumë personalitete, jo vetëm të kësaj zone, por të të gjithë vendit. Do ju sugjeroja dhe nxisja jo vetëm rezultate të mira në mësime, por edhe sa më shumë aktivitete sportive dhe gjithçka tjetër, që i largon fëmijët nga veset, problematikat, bullizmi. Kemi tashmë një fenomen tjetër, të cilin duhet ta luftojmë së bashku që është bullizmi përmes rrjeteve sociale, dhuna seksuale apo dhuna me bazë gjinore, përmes rrjeteve sociale, apo përmes instrumenteve të tjera të teknologjisë dixhitale. Në këtë aspekt, bashkë me mësuesit këtu, të rrisim forcën e bashkëveprimit. Ju e keni parë së fundmi, Policia e Shtetit ka arritur të identifikojë edhe rastet e dhunës përmes rrjeteve sociale. Jo më larg se 24 orë kemi ndaluar një person, i cili përmes një faqeje ‘fake’ në rrjete sociale, përndiqte, sulmonte një shtetase. Unë mendoj që të gjithë e dimë që ky është një problem që ekziston, kështu që në këto raste, ju lutem mos hezitoni që të kontaktoni oficeren e sigurisë, e cila e di fare mirë se kush është protokolli i saj për t’ia referuar çështjen Komisariatit të Policisë dhe më pas, në Drejtorinë e Policisë në Tiranë. Ne kemi një njësi të posaçme të luftës kundër krimit kibernetik në mënyrë që të qetësojmë sa më shumë shpirtrat e atyre që janë target i dhunës, por edhe familjet tuaja të cilat shqetësohen sa herë që ndodhin ngjarje të tilla”, nënvizoi Balla.

Nxënësit falënderuan autoritetet për paketën e sigurisë, si dhe rritjen e sigurisë në qytet. “Dua të shpreh dëshirën time, që pasi të mbaroj gjimnazin, të ndjek fakultetin e sigurisë dhe të mbrojtjes”, tha një prej tyre.

Drejtori i Përgjithshëm i Policisë së Shtetit deklaroi se Paketa e Sigurisë në shkolla është një ndër prioritetet kryesore të Policisë së Shtetit.

“Në raport me gjithë problematikat që ka pasur rrethi dhe qarku juaj, si Krujë, mendoj që kemi sjellë stafin më të mirë dhe çështjet e rendit dhe të sigurisë jo vetëm në shkolla por në të gjithë territorin, të shkojnë në nivelin e duhur të sigurisë. Absolutisht ne jemi në nismat ligjore të përafrimit të të gjithë kontigjentit të brezit të ri që mbarojnë shkollën e mesme, për të konkurruar për nivelin e oficerit pranë Akademisë së Sigurisë. Kështu që ju jeni të mirëseardhur, jo vetëm ju por edhe të tjerë, edhe vajzat, të cilat kërkojnë të konkurrojnë pranë Akademisë së Sigurisë”, u shpreh Rrumbullaku.

Ai informoi se Akademia e Sigurisë paralelisht me çeljen e konkurrimit për të vazhduar studimet e larta në qershor-korrik të vitit 2024, do të ketë një nga degët e kërkuara nga të rinjtë për të studiuar.